finalbanner

 

“Education is the most powerful weapon which you can use to change the world”

Nelson Mandela

Ni sa bula vinaka na Turaga kei na Marama ni Yasana ko Tailevu ena vanua levu oqo ko Mereke.

Au vakabula talega vei kemuni na vasu qaqa ni nodatou yasana.

Au vakananuma lesu tale na vula ko Maji, ni 2012 ni oti na noda lotu vata au a mai kerea meda qarava na Fiji Day ni 2012, ka me rawa ni tauyavu e dua nai umai lavo me tokoni kina na nodra vuli na gone ni Tailevu mai Viti.

Ni mai leqa na Marama Adi Samanunu Cakobau Talakuli, au mani nanuma me sa vakatokai vei ira na uma i lavo oqo. E a tavoci na Adi Samanunu Cakobau Talakuli Scholarship Fund, ena vula ko Jiulai 2012.

E ka ni marau vei au ni rawa ni sa mai vakavotukanataki na tatadra me baleta na nodra vukei na gone ni Tailevu ena vuli torocake. Sa mai soli vei iratou e lewe va na nodatou gone nai sevu ni sikolasivi ena yabaki 2013.

Me vaka e vakadonui me ra vukei yadua mai na tikina cokovata e lima.

Sa mai soli na nodratou sikolasivi ena Moniti 15 Jiune,2012, ena dua na kena soqo mai na valenivolavola ni yasana ko Tailevu.

A mai vulagi dokai kina o Ratu George Kadavulevu Cakobau ka ra mai vakadinadinataka talega na Turaga mai na vei tikina ena nodatou loma i yasana.

Na yacadra na gone era sa mai ciqoma nai sevu ni sikolasivi o:

  • Kitione Mateilevuka   Tikina Cokovata ko Bau
  • Vasiti Verebasaga         Tikina Cokovata ko Nakelo
  • Joana Vakaciqa           Tikina Cokovata ko Verata
  • Ulamila Navuni           Tikina Cokovata ko Sawakasa

E sega ni dua nai vola kerekere mai na tikina cokovata ko Wainibuka, Sa mani nanumi me sa qai soli e rua na sikolasivi ena yabaki mai oqo 2014.

Au sa vakavinavinaka vakalevu vei kemuni na dodo liga mai ena kena qaravi tiko na nodatou lotu ena yabaki sa oti kei na veisoqo e ya qaravi ena kena kumuni nai lavo.

Na vakavinavinaka talega vei kemuni na noda o ni se bera tiko ni veitokoni mai me baleta na sasaga yaga oqo. Au sa masuti kemuni meda mai duavata ena sasaga oqo ena yabaki oqo.

Nai tavi sa qaravi tiko e baleti keda kece eda vakatokai me vola kawa bula ena yasana ko Tailevu.

Au sa vakavinavinaka vei iratou na gone ni Tailevu mai Seattle kei Hawaii me baleta na veivuke kei na kena colati tiko na colacola yaga ni nodatou vanua.

Au via cavuta talega na noqu vakavinavinaka cecekia vei kemuni na noda i California. Na vakavinavinaka levu me baleta na kena qaravi na Lotu kei na soqo ni Fiji day.

Au kila ni da kalougata ni rawa ni da qarava nai tavu levu oqo ni vei kauwaitaki vei ira na gone ni Tailevu me ra tomona na nodra vuli torocake, ra vakarautaki me ra kedai sosomi vinaka ena siga n mataka.

Sa mai qaravi nai tavi levu oqo baleta na nodratou cakacaka vakaukauwa na komiti ni yasana o Tailevu. Au sa vakavinavinaka vakalevu vei kemudou kece sara.

Au vakavinavinaka talega vei Dr. Akanisi Kedrayate e nona veivuke en kena dikevi o ira na gone me soli vei ira na sikolasivi.

Sa dei tu ga na vosa ni Kalou “Kalougata o ira era soli naka mai vei ira era ciqoma.”

Me vakakougatataki kemuni na Kalou ka me noda kece na nona loloma ni tamada sa tabogo

Vinaka Vakalevu

Litia Cakobau

“I must be willing to give whatever it takes to do good to others. This requires that I be willing to give until it hurts. Otherwise there is no true love in me, and I bring injustice not peace, to those around me.”

Mother Teresa